Фонсека посебно пофали една ѕвезда на Милан: Тој е здрава зараза за своите соиграчи

Пауло Фонсека во период од една недела значително успеа да си ја подобри својата ситуација во Милан, бидејќи по победата во дербито над Интер, вчера неговиот тим беше убедлив и против Лече.

Трите последователни триумфи во Серија А носат доста помирни денови за португалскиот стручњак, кој до пред само седум дена беше отпишан од голем број реномирани италијански медиуми.

– Многумина не го очекуваа ова од нас, но тоа е убавината на фудбалот. Работите можат брзо да се сменат, на позитивен, но и на негативен начин. 90 минути се доволни за да се сменат многу нешта во фудбалот.

– Беше важно да се победи после дербито и да се продолжи добрата низа. Знаеме каква еуфорија владее кај фановите и сакавме истата да продолжи, – изјави Фонсека по триумфот од 3:0, по кој посебно го пофали и Алваро Мората.

– Карактеристиките на Мората ми овозможуваат да го играм меѓу линии, а тоа им помага на останатите во нападот. Тоа што посебно ми се допаѓа кај Алваро е неговата енергија. Со својата енергија носи здрава зараза за своите соиграчи. Поради него и Рафа Леао работи посилно во нападот, – изјави Фонсека.