Фонсека: Јувентус е подобар од Реал во еден аспект

Милан е домаќин на Јувентус во дерби натпреварот од 13. коло во италијанската Серија А, средба закажана за утре од 18 часот на „Сан Сиро“.

„Росонерите“ се на минус шест во однос на „бјанконерите“ и дефинитивно три бода се повеќе од неопходни, меѓутоа тоа нема да биде лесна мисија без разлика на тоа што клубот од Торино се соочува со доста проблеми со повреди кога е во прашање играчкиот кадар.

Ама Милан знае да „запали“ во дерби средбите во актуелнава кампања, па така пред нив паднаа Интер и Реал Мадрид, па тренерот Пауло Фонсека се надева на такво сценариот посочувајќи дека Јуве во еден аспект е подобар од „кралевите“.

-Не чувствувам притисок за ваков тип на натпревар (против Јувентус), тоа е прашање на мотивација. Лесно е да се разбере дека играчите се мотивирани против Интер, Јуве, Реал Мадрид, потешко е да се оди во Каљари и да се има истата желба.

-Мислам дека ќе биде поинаков натпревар. Мислам дека Јуве е посилен од Реал Мадрид во дефанзива. Подобро се бранат како тим, -порача Португалецот.