Фонсека е оптимист: Ги разбирам навивачите, Милан може да го освои Скудетото!

Милан и Јувентус разочараа во дерби пресметката во Калчо лигата, дуел во кој дефинитивно многу повеќе се очекуваше од домаќините поради сите проблеми со повредите на „бјанконерите“ и фактот дека за овој меч немаа класичен напаѓач на располагање.

Меѓутоа „росонерите“ беа премногу пасивни, внимателни и тоа не им се допадна на фановите кои со свирежи ги испратија своите миленици по завршувањето на средбата.

-Природно е кога не победувате, да има свирежи. Ако сум навивач, сфаќам дека не е добро да одам на стадион и да гледам ваков спектакл. Совршено ги разбирам навивачите за тоа, -истакна тренерот Паоло Фонсека.

-Мислам дека тоа беше многу тактички натпревар од двете екипи. Покажавме премногу почит кон Јувентус, а Јуве покажа премногу почит кон нас, што доведе до натпревар со многу малку преземени ризици. Знаеме дека Јувентус брани многу добро, па не е лесно да се создаваат шанси против нив. Имавме можности да нападнеме брзо, или не ризикувавме или донесовме погрешни одлуки. Не е лесно против нив, но во ситуациите кога можевме да создадеме нешто, грешевме при додавањето или избравме погрешна опција.

-Дефанзивно бевме добри, да не заборавиме дека Јуве даде четири гола на овој стадион против Интер пред неколку недели, -додаде Португалецот кој е оптимис дека Милан може да го освои Скудетото.

-Знам дека другите луѓе мислат дека тоа е малку веројатно, но јас продолжувам да верувам. Има уште толку многу натпревари до крајот, толку многу поени за освојување, сè може да се случи, -заклучи прредводникот на составот од Милано.