Флуминенсе со спектакуларна акција ја урна Бока и освои прва титула во Копа Либертадорес (Видео)

Големото финале во Копа Либертадорес се доживува поинаку од секој друг натпревар во Јужна Америка, а доказ за тоа добивме и на вечерашниот натпревар кој се одигра на бразилска „Маракана“.

Натпреварот меѓу Флуминенсе и Бока Јуниорс донесе нова историја во најважното фудбалско натпреварување во Јужна Америка, бидејќи бразилскиот клуб за првпат од постоењето го освои најпрестижното фудбалско натпреварување кое е идентична верзија на европската Лига на шампиони.

Бразилскиот тим предводен од Диниз (актуелен селектор на „кариоките) излезе како поуспешен по 120 минути игра, а мора да се напомене дека тоа беше максимално заслужено со оглед прикажаното на теренот.

Флуминенсе поведе со голот на Кано во 36-та минута и направи убава разлика во првиот период, но аргентинскиот великан не се откажа и во вториот дел израмни со одличен шут на дефанзивецот Адвинкула.

Ова се случи во 72-та минута, а во последните 20 ниту еден од двата тима не сакаше да ризикува и финалето отиде во дополнителни 30 минути игра.

Во овој период, клучниот момент се случи во 99-та минута кога фантастичната акција во гол ја круниса Џон Кенеди за големо славје на трибините, а потоа и за прва и историска титула на Флуминенсе.