Флорентино му испратил писмо на Гави, каталонските медиуми го поздравија потегот на претседателот на Реал

Пабло Гави заработи тешка повреда на коленото кое ќе го оддалечи од терените со месеци, а која уште отсега му ја прецрта актуелната натпреварувачка сезона, по која нема да настапи и на Европското првенство и Олимписките игри.

Младиот талент на Барса ја заработи една од најтешките повреди во фудбалот и беше крајно разочаран по епилогот на мечот со Грузија, бидејќи кинењето на предниот вкрстен лигамент е проблем кој гарантира долга пауза од терените, но и трпеливост и големо залагање.

Гави со солзи во очите ги доживеа сите тешки моменти и тоа им ги скрши срцата на сите членови на шпанската фудбалска репрезентација, па дури и на неговите противници на клупски план.

Дани Карвахал и Хоселу му испратија емотивни пораки на Гави за побрзо закрепнување и најдобро враќање на терените, но угледните шпански медиуми открија дека срдечно писмо до фудбалерот испратил и Флорентино Перез.

Претседателот на Реал Мадрид има пракса да испраќа писма до сите фудбалери кои се соочуваат со големи препреки и тешки повреди, па во писмото на Гави му посакал само добри желби и побрзо враќање на терените. Овој потег на Перез наиде на поздрав и од каталонските медиуми, кои посочија дека и покрај големото ривалство, меѓу двата клуба постои обостран респект кој најдобро говори за класата на Реал и Барса.