Флик откри зошто Де Јонг му го „украде“ местото на Касадо во стартната постава

Ханси Флик најави нови ротации за утрешниот натпревар против Реал Сосиедад во шпанската Ла Лига, јасно штедејќи сили за тоа што следи, односно осминафиналето против Бенфика во Лигата на шампиони.

Германскиот стручњак има извонредни месеци како тренер на Барселона и неговиот тим не знае за пораз во 2025-та година, а на стартот на месец март, Барса е во игра за сите титули до крајот на сезоната.

Откако славеше во Суперкупот, Барселона се наоѓа во доста добра позиција и во Ла Лига, Копа дел Реј и Лигата на шампиони, па целта на Флик е да се извади максимумот што може.

– Повторно ќе одмориме неколку играчи и ќе играат некои други. Напорниот распоред не смее да ни служи како изговор, истото важи и за екипите од Германија, Англија и другите стрени на Европа. Имаме свежи фудбалери и во игра сме во три натпреварувања. Мора да ги балансираме силите и ќе се бориме за трите титули. На стартот на сезоната, никој не можеше да замисли дека ќе бидеме во ваква позиција на 1-ви март, – изјави Флик, кој пред обраќањето со Реал Сосиедад, откри како Френки Де Јонг успеал да го потисне Марк Касадо во стартната постава.

– Френки многу се подобри во последните месец дена и нуди поразлични карактеристики од Марк. Касадо повеќе е во дефанзива, тој секогаш работи за тимот и задоволни сме од него. Тој е добар и може да се подобри, но може да биде горд на својата прва сезона во Барселона. Со Френки сега добиваме нешто друго, имаме повеќе посед на топка и знае да се справи во некои поразлични ситуации, – објасни Флик.