Флик објасни каков е планот на Барселона по тешката повреда на Тер Штеген

Барселона нема многу време за одмор и веќе подготвува нов натпревар во Ла Лига, оној против Хетафе на домашен терен кој е закажан за утревечер во 21:00 часот.

Каталонскиот гигант ќе го пречека мадридскиот ривал со импресивна серија на победи во домашното првенство (шест од шест), а во најавата за мечот, тренерот Ханси Флик доби и први поконретни прашања за чекорите кои планира да ги преземе клубот по лошата вест од неделата.

Марк Андре Тер Штеген заработи тешка повреда на коленото и ќе биде во аут најмалку осум месеци, па сега Барселона се најде во ситуација да бара решенија во вид на слободни агенти, или во вид на штотуку пензионира голмани како Шчесни и Браво.

Флик денеска ја информираше јавноста дека прво решение на стручниот штаб и на клубот е Ињаки Пења, но истовремено ќе се разгледува кој може да пристигне како надополнување за вториот голман.

– Ињаки имаше многу добри подготовки и целосно му веруваме. Работеше многу напорно за да остане тука. Тој е концентриран и подготвен за игра. Целосно му веруваме, но исто така мора да разгледуваме и опции за пополнување на местото. Останатите голмани кои ги имаме се многу млади. Во овој момент не сме под притисок, го имаме Ињаки и веруваме во него, но ќе видиме што ќе донесе иднината, – изјави Флик.