Флик ја истакна најдобрата страна на Црвена Звезда пред вечерашниот меч во Белград (Видео)

Ханси Флик ја изведе Барселона на прав пат и засега му оди навистина добро како предводник на каталонскиот гигант, бидејќи покрај тоа што неговиот тим е лидер во Ла Лига, почна да собира бодови и во Лига на шампиони.

Победата од 4:1 над Баерн Минхен дефинитивно ќе биде потстрек за уште подобри резултати во Европа, а следна станица за каталонците е српската престолнина и пресметката со Црвена Звезда.

Натпреварот се игра оваа вечер во Белград, па иако Барса влегува како апсолутен фаворит за победа, Ханси Флик истакна дека добро го анализирам противничкиот тим.

– Ова е нов вид Лига на шампиони и нема лесен противник. Сега е уште поважно да победувате на секој меч. Знаеме дека не чека тежок меч на тешко гостување, видовме дека Црвена Звезда има добар тим. Особено се добри во нападот, тоа е нивната најдобра страна, но ние дојдовме тука за да победиме.

– Наша цел е да победуваме на секој следен меч во Европа. Сакаме да бидеме меѓу најдобрите 8 на табелата и директно да се пласираме во осминафиналето. Не ми се допадна второто полувреме кое го одигравме против Еспањол, не смееме да одиграме така против Звезда, – изјави германскиот тренер.

Барселона вчеравечер го одработи и предвидениот тренинг на „Рајко Митиќ“, а тоа беше снимено од нашите колеги од „Спортско радио 90,3 ФМ“.