Фјури го претепа Чисора, па двајцата заедно јадеа хамбургери по крајот на борбата (Видео)

Тајсон Фјури го претепа Дерек Чисора и ја затвори оваа боксерска „трилогија“ со трета победа во меѓусебните дуели, но двајцата тешкаши по крајот на борбата покажаа дека имаат изградено навистина добар и пријателски однос.

Фјури беше доминантен во текот на цела борба и заслужено го одбрани појасот во ВБЦ категорија, а борбата беше прекината во 10-та рунда кога судијата Виктор Лоуглин процени дека Чисора изеде премногу ќотек за да остане на две нозе.

Популарниот „Џипси Кинг“ уште еднаш покажа дека е недопирлив кога се во прашање борбите во тешка категорија и веднаш по победата го бакнуваше Чисора, но го прозва и Усик со кого сака да се пресмета во рингот во својата следна спектакуларна борба.

За работите да бидат уште поинтересни се погрижи и самиот Украинец кој се качи на рингот и мирно ги слушаше заканите од Фјури, кој пак беше комплетно различно расположен кога е во прашање Чисора.

Откако завршиле сите активности на рингот и надвор од него, двајцата одвоиле време за себе во подтрибинскиот простор и се почастиле со по неколку хамбургери за да ја надокнадат енергијата загубена за време на борбата.

🍔 @Tyson_Fury and @DerekWarChisora share a Five Guys after their fight.#FuryChisora pic.twitter.com/emhjiTFGxU

— Frank Warren (@FrankWarren) December 4, 2022