„ФИФА вирус“: Разочараниот Клоп потврди дека загуби важен стартер на три месеци

Во период кога клупскиот фудбал има неверојатно згуснат и напорен распоред, најлоша вест за тренерите се и репрезентативните обврски, пред се поради тоа што доста често знае да дојде до тешки повреди.

Нејмар стави крај на цела сезона откако го скина предниот вкрстен лигамент и нема да одигра ниту еден натпревар до крајот на 2024-та година, но „ФИФА вирусот“ го зафати и Ливерпул и донесе лоша вест за Јирген Клоп.

Енди Робертсон се повреди на мечот на Шкотска и неговото рамо беше имобилизирано неколку дена, но дополнителните прегледи од експертите донеле до заклучок дека единствено вистинско решение е операција.

Клоп денеска потврди дека сигурниот стартер на левата бековска позиција ќе го нема долго на располагање, а медицинската пракса вели дека ќе биде во аут најмалку три месеци.

– Одлуката кон која одиме е операција, а тоа значи дека Робертсон ќе го нема долго време. Имаше мала шанса да пробаме без операција, но после советите од неколку експерти, изгледа дека операцијата е најдобро решение кога се гледа на долгорочен план. Искуството вели дека ќе може брзо да се врати на тренинзите, но кога е во прашање натпреварувачки ритам, нема да сметаме на него долго време, – изјави разочараниот Клоп.