ФИФА размислува за СП со 64 репрезентации во 2030 година

Светската фудбалска федерација (ФИФА) ќе го разгледа предлогот за еднократно зголемување на бројот на мундијалски учесници за Светското првенство во 2030 година.

Овој мундијал има посебно значење бидејќи со него ќе се прослави 100-годишниот јубилеј од одржувањето на првото СП во Уругвај во 1930 година, па претставник на Уругвајската фудбалска федерација предложил и дополнително зголемување на бројот на учесници.

Мундијалот во 2026 година ќе биде прв со 48 репрезентации и се очекуваше дека оваа бројка ќе остане активна барем една или две децении, пред евентуална нова експанзија, но јубилејот може да донесе и дополнително зголемување веќе за пет години.

СП во 2030 година има уникатен концепт и во однос на организаторите, бидејќи ќе започне со по еден натпревар во Уругвај, Парагвај и Аргентина, за останатите натпревари да се играат во Шпанија, Португалија и Мароко.