ФИФА номинираше 11 фудбалери за признанието најдобар фудбалер за 2021 година

Светската фудбалска федерација (ФИФА) денеска ги објави имињата на фудбалерите кои влегуваат во конкуренција за признанието за најдобар светски фудбалер во 2021 година.

Наградата „The Best“ ќе биде доделена на почетокот на следната година, а фановите ќе може да бираат меѓу единаесет големи фудбалски ѕвезди.

Покрај Лионел Меси и Кристијано Роналдо, на списокот се и Карим Бензема, Килијан Мбапе, Нејмар, Роберт Левандовски, Кевин де Брујне, Ерлинг Халанд, Жоржињо, Н”Голо Канте и Мохамед Салах.

Фановите можат да гласаат до 10. декември, а ФИФА во јануари ќе ги објави тројцата финалисти.

ФИФА повторно ќе избере и најдобар голман, а за наградата ќе се борат Алисон Бекер, Мануел Нојер, Каспер Шмајхел, Џанлуиџи Донарума и Едуард Менди.