ФИФА ќе ја казни Србија поради контроверзното знаме во соблекувалната (Фото)

Српската фудбалска репрезентација загуби на првиот меч на Светското првенство и веќе се подготвува за вториот кој се игра задутре, но водечките луѓе на Федерацијата ќе имаат доста напорни часа до понеделник поради истрагата која ја отвори ФИФА.

Светската фудбалката Федерација официјално отвори истрага против Србија и повеќе од веројатно е дека ќе изрече казна за нашиот северен сосед, сето тоа како последица на политичката порака испратена од првиот меч.

Знаме од соблекувалната на Србија на кое пишува „нема предавање“ и на кое беа исцртана територијата на Косово стана вирален хит на социјалните мрежи, но тоа предизвика остра реакција од повеќе институции во Косово.

Поплаките на крајот стигнаа и до ФИФА, а најважната Федерација попладнево го извести фудбалскиот сојуз на Србија дека е под истрага поради сомнеж за сомнителни пораки кои немаат никаква врска со фудбалот.

Светската куќа на фудбалот не објави кога ќе излезе со пресуда за оваа дисциплинска постапка, но многу веројатно е дека ќе се знае епилогот до понеделник пред 11 часот, термин во кој Србија ќе игра против Камерун.