ФИФА ги откри гласовите на селекторите и капитените: Милевски го игнорирал Винисиус, Барди му дал предност на Родри

ФИФА традиционално во својот избор за најдобар играч на годината ги вклучува капитените и селекторите на фудбалските репрезентации, а откако најпрестижното признание му беше предадено на Винисиус Жуниор, светската Федерација ги откри и гласовите од гласањето.

Секоја членка на ФИФА има право да даде по три гласа во категорија на селектор, капитен и новинар, па интересно е да се напомене дека Благоја Милевски и Енис Барди во ниту еден случај не го гледаа Винисиус како победник на церемонијата „The Best“.

Македонскиот селектор не му дал ниту еден бод на Винисиус Жуниор, но затоа им дал пет и три поени на Дани Карвахал и Џуд Белингам.

Според фудбалското гледиште на Милевски, на третото место е Родри кој добил еден бод, а вреди да се напомене дека Шпанецот ја загуби битката со Винисиус само поради тоа што капитените дале повеќе гласови за Бразилецот.

Енис Барди на првото место го сместил добитникот на „Златната топка“ од Манчестер Сити, три бода му доделил на Винисиус, а еден на Ерлинг Халанд.