ФФМ: Есенскиот дел од сезоната ќе заврши без публика на стадионите

Фудбалската Федерација на Македонија ги откажа сите натпревари кои требаше да се одиграат изминатиот викенд, а откако го презакажа цело коло за утре, денеска излезе со информација и за последното од есенскиот дел од сезоната.

ФФМ ги информираше клубовите дека годината ќе се затвори без присуство на навивачите на фудаблските стадиони во Македонија, сето тоа по барање на Министерството за Внатрешни работи.

– Комисијата за натпревари во рамки на Фудбалската федерација на Македонија праќа информација до клубовите од Прва МФЛ и фудбалската јавност за одлуката донесена по барање на Министерството за внатрешни работи (МВР) во врска со натпреварите од 17. коло и 18. коло во Прва МФЛ.

– Комисијата за натпревари го прифати барањето и донесе одлука натпреварите од 17. коло (03. декември, 13:00 часот) и 18. коло (08. декември, 13:00 часот) во Прва МФЛ да се одиграат без присуство на публика.

– Одлуката на Комисијата за натпревари е донесена поради извршена проценка на Министерството за внатрешни работи заради неодамнешните случувања и спречување на било каков вид на насилство и недолично однесување пред, за време и по одигрување на фудбалските натпревари.