Фетел за заминувањето од Ферари: Сфативме дека нема заедничка желба за продолжување

Утрово од таборот на Ферари објавија дека нема да ја продолжат соработката со Себастијан Фетел кој ќе си оди од клубот по крајот на сезоната.

Фетел има договор до крајот на 2020 година и истиот нема да биде продолжен, па Германецот ќе има слобода да бира во кој тим ќе продолжи следната сезона.

32 годишниот пилот во своето простување со Ферари посочи дека заедно со луѓето од клубот сфатиле дека веќе нема заедничка желба за продолжување на соработката, па ваквиот чекор бил логичен по целиот развој на настаните.

– Мојата врска со Ферари ќе заврши по крајот на 2020 година. Со цел да се добијат најдобрите резултати во овој спорт, најважно за сите е да се работи во перфектна хармонија. Со тимот заедно одлучивме дека веќе нема заедничка желба да останеме заедно по крајот на оваа сезона.

– Финансиските примања не играа улога во оваа одлука. Тоа не е начинот на кој јас размислувам кога носам важни одлуки.

– Ферари зазема специјално место во Формула 1 и јас се надевам дека ќе го добијат сиот успех кој го заслужуваат. За крај, сакам да се заблагодарам на цело семејство Ферари, а најмногу на тифосите насекаде низ светот за поддршката која ми ја дадоа изминативе години, -изјави Фетел.