Ферстапен се „прошета“ во Шпанија, одличен викенд и за Мерцедес

Трката за големата награда на Шпанија не донесе возбудувања кога е самиот врв во прашање, бидејќи Макс Ферстапен имаше мирно попладне во кое лесно стигна до нова победа во Ф1 шампионатот, а воедно го избре и најбрзиот круг за кој доби дополнителен бод.

Актуелниот првак само на стартот беше предизвикан од Карлос Саинц, но откако го задржа првото место во првиот свиок, потоа имаше празен простор пред себе и цели 66 круга ниту еднаш не беше тестиран.

Возачот на Ред Бул направи голема разлика и лесно ја чуваше разликата пред конкуренцијата, која овојпат не беше сочинета од двајцата возачи на Астон Мартин.

Фернандо Алонсо немаше свој ден и заврши на седмата позиција, но затоа одлични беа возачите на Мерцедес кои се изборија за место на пиедесталот и режираа навистина добар викенд во Каталонија.

Луис Хамилтон и Џорџ Расел го комплетираа подиумот на денешната трка, додека Серхио Перез сериозно напредуваше од 11-то место, но на крајот мораше да се задоволи со четвртото. Саинц имаше најголем пад од водечките и заврши петти, а покрај Строл и Алонсо, во првите десет завршија Окон, Цунода и Жу.