Ферстапен не ги заврши квалификациите, Перез ја освои пол-позицијата во Џеда

Трката за Големата награда на Саудиска Арабија ќе почне на доста неочекуван начин, бидејќи при самиот врв нема да го гледаме Макс Ферстапен кој имаше голем проблем со својот болид и мораше да се откаже во претпоследната квалификациска сесија.

Поради недостаток на сила на неговиот Ред Бул, Макс беше приморан да се повлече во боксот и да се откаже од квалификациите во ситуација кога беше главен фаворит за првото место, па така утре ќе стартува од 15-то место во Џеда.

Во такви услови, Серхио Перез потврди дека Ред Бул е класа за себе и ја освои пол-позицијата, додека второ најдобро време оваа сабота имаше Шарл Леклер.

Сепак, поради казната од 10 места, возачот на Ферари утре ќе стартува од 12-то место, што значи дека Фернандо Алонсо ќе стартува од првиот ред до Перез.

Искусниот Шпанец имаше трето најдобро време, но поради казната на Леклер ќе стартува втор и ќе има шанса за напад на стартот на утрешната трка. Во топ 10 се најдоа уште Расел, Саинц, Строл, Окон, Хамилтон, Пиастри и Гасли.