Ферстапен му ја „украде“ пол-позицијата на Алонсо во Монако

Макс Ферстапен ќе стартува прв на трката за Големата награда на Монако, откако денеска во самата завршница успеа да му ја „украде“ пол-позицијата на шпанскиот ветеран, Фернандо Алонсо.

Во моментите кога се чинеше дека возачот на Астон Мартин ќе направи нов супер резултат и ќе има добра шанса да стигне до прва победа сезонава, актуелниот шампион извозе брутално добар круг во последниот обид и за 84 илјадити дел имаше подобро време од Алонсо, па така Макс стигна до третата пол-позиција на шестата трка од стартот на годината.

За уличната трка во Монте Карло, еден од главните фаворити за највисок пласман беше и Серхио Перез кој е специјалист за вакви патеки, но денеска направи голема грешка и го уништи својот болид уште во воведот од квалификациите.

Поради тоа, Мексиканецот ќе стартува од задниот дел од опашката и ќе има навистина тешка трка утре попладне, па тоа ќе биде добра прилика за Макс да направи нова разлика во генералниот пласман.

Покрај Макс и Алонсо, во првите 10 се најдоа Леклер, Окон, Саинц, Хамилтон, Гасли, Расел, Цунода и Норис.