Фернандеш за шансите на Јунајтед за титула: Свесни сме…

Манчестер Јунајтед не се прослави на дербито со Ливерпул на кое загуби со 3-0 со што остана на само три освоени бода по три кола во Премиер лигата.

„Црвените ѓаволи“ потрошија преку 205 милиони фунти во летниот преоден рок се со цел да бидат подобри, поконкуретни, односно да го нападнат врвот на табелата, ама ако се суди по самиот старт и изданија против Фулам, Брајтон и секако вчерашното на „Олд Трафорд“ тогаш повеќе од јасно е дека доста работи ќе мора да се променат ако се сака остварување на целта/целите на клубот за оваа сезона.

Капитенот Бруно Фернандеш беше искрен и посочи на што Јунајтед мора да се фокусира во кампањата 2024/2025.

-Не треба да ги гледаме резултатите. Она што го кажав и обновувањето беше долгорочна работа. Совршено сум свесен дека Јунајтед во овој момент не е подготвен да го освои шампионатот. Ние се бориме за тоа.

-Минималната цел е да завршиме меѓу првите четири, што ни ја гарантира Лигата на шампионите. Но, свесни сме дека имаме уште многу работи да подобриме за да можеме да сонуваме за оваа поголема цел, што е она што јас и сите ние го сакаме, а тоа е да го освоиме шампионатот, -порача Фернандеш.