Фердинанд со хит изјава: Играчите на Ливерпул се како „ротвајлери“ кои не се нахранети со години!

Многумина му прогнозираа тежок старт на Арне Слот на клупата на Ливерпул после успешното владеење кое го имаше Јирген Клоп на „Енфилд Роуд“, но засега холандскиот стручњак ги остава настрана ваквите фудбалски стереотипи, и тоа на начин кој ги воодушевува навивачите на „Енфилд Роуд“.

Тимот на Слот изгледа навистина неверојатно од стартот на сезоната и има биланс од 17 победи на 19 одиграни натпревари, статистика која го прави Ливерпул убедливо најдобар фудбалски колектив во Европа во овој момент.

Доказ за тоа е и синоќешната победа над Реал Мадрид со резутлат 2:0, но легендарниот Рио Фердинанд е далеку повоодушевен од начинот на кој „црвените“ ја остварија истата.

Фудбалерите на Слот едноставно „гризеа“ на теренот и се бореа за секој метар од теренот на „Енфилд“, па тоа го натера Рио да направи една хит компарација за тоа како ги доживува избраниците на Арне.

– Ливерпул игра како тим кој ги има најгладните индивидуацли во светот. Не само што остваруваат добри резултати, тие изгледаат толку гладно за успех…..

– Изгледаат како да не се нахранети со години, изгледаат како „ротвајлери“ кои трчаат по теренот и ги бркаат своите ривали. После вакво издание, може да се каже само едно: Тие фрлија ракавица кон другите тимови во Европа и испратија јасна порака. Ливерпул во моментов изгледа како најдобар тим во Европа, – заклучува Рио.