Фердинанд му се спротивстави на Кин: Зарем ни е потребна уште една сага?

Рој Кин испрати брутален предлог до Ерик Тен Хаг по крајот на манчестерското дерби, советувајќи го актуелниот менаџер да му ја одземе капитенската лента на Бруно Фернандеш.

Легендарниот Ирец му даде поддршка на Тен Хаг и порача дека тој е вистинскиот човек за да го води тимот, но истото мислење не го дели за човекот кој треба да биде лидер на теренот.

– Првата работа која јас би ја направил е промена на капитенот. Бруно Фернандеш не е материјал за капитен. Тој постојано се жали и „плаче“. Тој е целосен контраст од тоа како треба да изгледа еден капитен, – изјави вчера Кин.

Поради неговата популарност во Англија, оваа изјава брзо отвори голема дебата во јавноста и голем број навивачи на Јунајтед се согласија со поранешниот капитен, но не и Рио Фердинанд.

– Не може да „фрламе“ такви коментари во јавноста. Тоа што го кажа Рој е лудо. Ова го велам бидејќи досега најголемите проблеми за Тен Хаг ги создадоа сагите кои ги имавме во неколку месеци. Прво беше Гринвуд, потоа Санчо, сега го имаме и Антони. Зарем ни треба уште една сага со капитенската лента? Сите видовме како тоа влијаеше кога му беше одземена лентата на Мегавер.

– Капитенската лента во еден клуб е огромна работа и сметам дека не е вистинско време да има промена. Наместо да се фокусираме на фудбал, се фокусираме на други полиња. Не ни е потребна уште една непотребна сага во клубот, не верувам дека тоа ќе помогне во оваа тешка ситуација, – изјави Фердинанд.