Фердинанд ја откри својата омилена ѕвезда од фудбалска Европа: Вакво нешто не правеше ниту Меси

„Глоуб“ фудбалските награди кои се одржаа во Дубаи привлекоа голем број фудбалски ѕвезди во Обединетите Арапски Емирати, а дел од елитата која продефилира на црвениот тепих беше и Рио Фердинанд.

Легендарниот стопер на Манчестер Јунајтед е составен дел од фудбалот како актуелен аналитичар и основач на популарен поткаст, па иако најчесто за задржува на теми кои се поврзани со клубовите од Премиер лигата, излетот во Дубаи го искористил да дава одговори и на новинари од други земји.

„Мундо Депортиво“ како еден од шпанските медиуми на настанот ја искористил можност да му постави едно прашање на Фердинанд, а истото било поврзано за најголемата фудбалска сензација во Европа, Ламин Јамал.

– Што да се каже за него, јас го сакам тоа момче. Ќе направам фотографија со него и ќе го прегрнам кога ќе го видам. Никогаш не сум видел некој да го прави тоа што тој го прави на негова возраст.

– Немавме видено, а нема ни да видиме нешто слично. На таа возраст веќе директно влијае на натпреварите, тоа не го правеше ниту Меси. Навистина го сакам и го обожавам овој фудбалер, – порачал Фердинанд во разговорот со каталонскиот медиум.