Фердинанд: Арсенал ќе стане шампион ако купи еден фудбалер

Рио Фердинанд верува дека Арсенал може да го промени статусот од претендент до шампионски тим со само едно големо засилување во текот на следниот летен преоден рок, и тоа на позиција која веќе некое време се покажува како критична во системот на Микел Артета.

Како што стојат работите, Арсенал трета сезона по ред ќе остане покус во една шампионска битка за Премиер лигата, а ако во двата претходни наврати ја губеше истата од Манчестер Сити, овојпат во пол-позиција е Ливерпул.

Фердинанд смета дека овој тим на Микел Артета ќе продолжи да се бори и наредната сезона, но е уверен дека ќе стане и шампион доколку успее да го купи Александер Исак од Њукасл.

– Арсенал е во потрага на 9-ка веќе две или три години. Ако успеат да го купат Исак, тогаш ќе завршат огромна работа.

– Може да ја освојат Премиер лигата со играч како него. Тој е феномен и ќе им даде нешто поразлично. Овој тим на Артета има многу добри делови, но потребен е напаѓач за да се заокружи мозаикот, – вели Фердинанд.