Федерер за скандалот на Синер: Некој треба да даде одговор на важно прашање

Рожер Федерер е уште еден тениски авторитет кој не можел да ја избегне темата „Синер“ и бил прашан за мислење во однос на допинг скандалот во кој се најде италијанскиот тенисер.

Швајцарецот кој веќе ја заврши кариерата зборувал на темата и потенцирал дека и покрај вербата која ја има во Синер, целата процедура очекувано отворила дебата и многу контроверзи.

– Ова не е нешто што сакаме да го гледаме во нашиот спорт. Без дали некој направил нешто или не, не сакаме да ни се случува ваква „бучава“.

– Разбирам дека е невообичаена ситуација, вистински кошмар за секој спортист е да има против себе вакви обвинувања бидејќи секојдневно мораме да пополнуваме формулари на оваа тема. Се будиш наутро и помислуваш дали некој ќе тропне на врата за допинг тест.

– Ја разбирам фрустрацијата во однос на тоа дали тој бил третиран поинаку од другите. Мислам дека речиси сите мислиме дека Јаник не направил ништо намерно, но некој треба да даде одговори за невообичаената одлука тој да не биде привремено суспендиран додека се утврдувале фактите, – изјавил Федерер.