Фабрегас го договори досегашниот капитен на Барселона, но ќе го засили тимот и со играч на Реал

Сеск Фабрегас се соочи со реалноста уште во првото коло во Серија А, па тоа значи дека последните 10 дена од летниот преоден рок ќе мора да ги искористи за да ги добие потребните засилувања.

Комо настапи со осум играчи во стартниот тим кои беа дел од тимот кој се натпреваруваше во Серија Б, но брзо стана јасно дека некои од нив не се дораснати за елитата, особено не за натпревари како оној против Јувентус.

„Старата дама“ лесно победи со 3:0 и можеше да постигне најмалку уште три гола, па целта на Комо во преостанатите 10 дена ќе биде да донесе позвучни и поквалитетни имиња кои може да си ги дозволи во овој момент.

Како што јавуваат шпанските медиуми, Фабрегас веќе исконтактирал со Серхи Роберто и го убедил доскорешниот капитен на Барселона да пристигне како слободен агент, но тој нема да биде единствениот од Шпанија кој ќе го засили неговиот тим.

Покрај искусниот играч за врска, Фабре го „капарисал“ и талентираниот Нико Паз кој веќе дебитираше за Реал Мадрид, но за кој нема место во супер моќниот тим на Карло Анчелоти.