ФА ќе истражува дали Тонали се обложувал и по преселбата во Англија

Нема крај за проблемите на Сандро Тонали, кој е суспендиран поради нелегално обложување, а во меѓувреме ќе мора да исчекува резултати и од новата истрага.

Англиската фудбалска асоцијација реши да утврдува дали Италијанецот продолжил со нелегално обложување на фудбалски натпревари и по пристигнувањето во Њукасл, нешто што може да му донесе дополнителна казна од ФА.

Тонали веќе постигна договор со обвинителите во Италија за 10-месечна суспензија и истата важи глобално со асистенција на ФИФА, па ќе пропушти навистина голем период во екипата која плати сериозна сума за неговите услуги.

Њукасл веќе потврди дека клубот немал никаква информација за нелегалните активности на Тонали, односно дека раководството не може да знае дали и Милан не бил информиран за овој спорен момент, кој донесе суспензија за италијанскиот репрезентативец.

ФА е посебно строга во однос на забраните за обложување, а неодамна го казни англискиот репрезентативец Ајван Тони со суспензија на осум месеци.