Евролига: Шортс и Париз го урнаа Реал среде Мадрид, Баерн ја елиминираше Звезда после голема драма

ПАриз направи голем подвиг и ја продолжи својата вонсериска сезона во Евролигата, такашто со победата над големиот Реал Мадрид успеа да си обезбеди место во плејофот.

Тимот на македонскиот репрезентативец Ти-Џеј Шортс не се уплаши од атмосферата и од противникот и успеа да слави во шпанската престолнина, па на крајот оствари и комотен триумф од 73:81.

Париз диктираше темпо од самиот старт и на полувреме замина со дцоцифрена предност, па иако Реал се закани во третата четвртина, немаше доволно сили за пресврт во клучниот период.

Гостите одолеаа на притисокот и со цврста одбрана го неутрализираа фаворизираниот тим, а со тоа се израдуваа на голема победа со обезбедено седмо место во плејофот.

Шортс беше играч број еден на теренот со 23 поени, 9 асистенции и 2 скока.

Далеку подраматично и понеизвесно вечерва беше во Минхен, каде Баерн после продолжение успеа да ја урне Црвена Звезда и да ја елиминира од Евролигата.

Баерн помисли дека ја обезбеди победата кога Едварс погоди за 84:82 на две секунди пред крајот, но гостите успеаја да изведат импресивна акција во следниот напад и преку Петрушев да изборат продолжение.

Во дополнителните пет минути, Звезда отвори многу лошо и дојде до негатива од пет поени, што на крајот се покажа како пресудно за пораз од 97:93.

На овој начин, Баерн си обезбеди уште еден натпревар за пласман во плејофот, а противник ќе му биде поразениот Реал Мадрид.