Евертон си обезбеди рекорден спонзорски договор со производител на спортска опрема

Премиерлигашот Евертон ќе добие сериозна финансиска инјекција, откако потпиша нов спонзорски договор со производител на спортска опрема.

„Карамелите“ решија да ја завршат соработката со „Umbro“ и наредните три години ќе носат дресови и спортска опрема од брендот „Hummel“, кој на англискиот тим ќе му исплати 30 милиони фунти за трите сезони.

Тоа е значително подобрување на финансиските ресурси на Евертон, бидејќи според досегашниот договор, клубот од „Гудисон Парк“ по сезона добиваше помалку од половина од таа сума, односно по 4,5 милиони фунти.

Интересно е што Евертон ќе ја заврши соработката и со досегашниот спонзор на дресовите, букмејкерската куќа „Sportpesa“, а засега не е јасно кој ќе ја заземе оваа позиција.

Без разлика на новата ситуација, при најавениот рестарт, Евертон ќе ја доигра сезоната со дресовите на „Umbro“.