Евертон и Ливерпул добија дозвола да играат на „Гудисон Парк“

Градските власти и полицијата во Ливерпул денеска дадоа зелено светло за Евертон и Ливерпул да ги играат преостанатите натпревари од Премиер лигата на своите стадиони.

Двете екипи од Ливерпул веќе на 21 јуни го играат градското дерби, а Евертон денеска доби дозвола таа средба да ја организира на „Гудисон Парк“, со што е елиминирана неизвесноста во пресрет на овој дуел.

Доколку одговорните решеа спротивно, Евертон и Ливерпул ќе требаше да играат на неутрален терен.

Со денешната одлука, Евертон ќе одигра вкупно пет натпревари на домашен терен на својот стадион, а по „Мерсисајд“ дербито следуваат пресметките со Лестер, Саутемптон, Астон Вила и Бурнмаут. Одлуката го прави и „Енфилд“ достапен за Ливерпул и неговите натпревари.

Во зависност од резултатот на средбата Манчестер Сити-Арсенал која се игра на 17 јуни, Ливерпул може да биде крунисан за шампион уште по градското дерби, кое се игра четири дена подоцна.