Еурофарм Пелистер со убедлива победа го стартуваше турнирот во Струга

Еурофарм Пелистер како актуелен македонски првак имаше можност да го отвори традиционалниот ракометен турнир во Струга, и тоа против истоимената домашна екипа која денеска се обиде да ги предизвика „зелено-белите“.

Меѓународниот струшки турнир секој август се игра под отворено небо крај Охридското езеро, а оваа година 52-то издание почна со дуел на Струга и Пелистер, кој инаку беше неизвесен само во почетниот дел.

Стружани беа во егал ситуација до 8:8 кога се играше гол за гол на двете страни, но од овој момент шампионот почна да се одлепува и направи серија со која замина на пауза со 18:14.

Македонскиот шампион започна фуриозно во вториот дел и во оваа фаза го реши победникоот на денешниот меч, бидејќи Пелистер постигна седум, а Струга само еден гол.

Еурофарм дојде до двоцифрена разлика од 25:15 и тука стана јасно дека фаворитот ќе запише победа, која на крајот беше и преубедлива со резултат 39:22.

Атанасијевиќ и Кузмановски постигнаа по шест гола во победничкиот тим, додека во порарзениот се истакна Летиќ со пет погодоци.