Еурофарм Пелистер се закани на гостувањето во Данска, но потфрли во второто полувреме

По паузата која владееше на европската сцена, Еруфорам Пелистер се врати на обврските со гостување во Данска, на кое вечерва одново покажа две лица и на крајот претрпе нов пораз од Скандерборг Архус со резултат 24:22.

Ракометарите на Пелистер го забележаа четвртиот неуспех во седмото коло во ЕХФ Лигата на Европа, пред се поради црните 10-тина минути кои надвиснаа над гостинскиот тим во второто полувреме.

Тимот на Ларс Валтер беше подобар во првото полувреме и во најголем дел одржуваше предност од два гола, но на крајот на полувреме се замина со резултат 11:11.

На стартот на второто полувреме, домаќниот Архус направи серија од 10:3 и поведе со 21:14 на семафорот, а оваа црна дупка во играта на Пелистер се покажа како пресудна за поразот.

До крајот, нашиот претставник успеа да се консолидира и да се избори за подостоен пораз од 24:22, што сепак е премала утеха за добрата игра прикажана во првите 30 минути.

Голманот Лесјак беше фантастичен во првото полувреме и собра 10 одбрани до 25-та минута, а на крајот мечот го заврши со 12 одбрани. Кај стрелците, Жарко Пешевски и Мирко Радовиќ постигнаа по четири погодоци.