Еурофарм Пелистер и Вардар понудија ракометна рапсодија во Битола, на крајот се радуваа домаќините

Еурофарм Пелистер и Вардар одиграа една од најефикасните дерби пресметки во последно време, бидејќи двата македонски великани денеска не мислеа многу на одбрана и гледаа само да постигнат гол повеќе во противничката мрежа.

Ваквиот расплет не можеше да се замисли по првите 30 минути во кои на паркетот доминираше само еден тим, но Вардар одби да се предаде и се погрижи за вистинска драма во второто полувреме.

Слично како при своите неверојатни враќања во Лигата на шампиони, Вардар се обиде да направи кам-бек од „минус девет“ и се погрижи за трилер завршница, но сепак ракометарите од Битола останаа мирни и успеаја да остварат победа од 35:33.

Еурофарм Пелистер одигра речиси перфектно прво полувреме по кое имаше предност од 22:13, но вардарци уште еднаш покажаа голем карактер и на две минути пред крајот на натпреварот дојдоа на само „минус еден“. Како клучен се покажа голот на Радивојевиќ за „плус два“, а токму овој играч беше најдобар поединец на мечот со неверојатни 13 реализации.

Богдан беше нерешлива енигма за одбраната на Вардар и го наполни голот на гостите, осум постигна Кузмановски, додека во таборот на Вардар најефикасен беше Крсманчиќ со девет погодоци.

Еурофарм Пелистер со оваа победа се израмни со Вардар на табелата, но скопскиот ривал има подобар меѓусебен дуел поради тоа што на домашен терен славеше со три гола разлика (27:24).