Еурофарм Пелистер го одбрани домашниот терен во дербито со Алкалоид

Еурофарм Пелистер како најдобар тим во регуларниот дел од сезоната се врати на првото место во ракометниот плејоф, откако вечерва во возбудлив и интересен натпревар го доби дербито со Алкалоид.

Триумфот од 30:28 значи дека битолчани остануваат главни претенденти за највисок пласман и оваа сезона, но од друга страна, Алкалоид го претрпе и вториот пораз во третото коло од разигрувањето, што прави работите за избраниците на Кирил Лазаров да бидат доста посложени.

Тимот од Автокоманда доби тежок распоред на стартот и ова е втор неуспех на гостински терен по оној против Вардар во „Јане Сандански“, а тоа прави сега да има пет бодови помалку од првопласираниот Еурофарм Пелистер.

За разлика од мечот против Вардар, Алкалоид денеска беше далеку поконкурентен и беше во егал ситуација во најголем дел од мечот, но на крајот пресуди искуството на домаќините, како и огромната поддршка која ја добиваа играчите во зелено од своите навивачи.

Еурофарм Пелистер победи со 30:28 и останува перфектен на стартот на плејофот, па сега има вкупно девет бодови, еден повеќе од второпласираниот Вардар.