Ериксен од херој до трагичар: Мајсторски гол, па голема грешка на „Олд Трафорд“ (Видео)

Кристијан Ериксен се претвори од херој во трагичар на „Олд Трафорд“, бидејќи вечерва постигна мајсторски гол за водство на Манчестер Јунајтед, за потоа да направи голема грешка и да им подари гол на гостите од Холандија.

Твенте успеа да освои голем бод на отворањето на новата сезона во Лигата на Европа, а истиот има уште поголемо значење ако се знае дека голманот Унерштал имаше извонредна одбрана во самата завршница.

Пред да дојде до завршната фаза од натпреварот, Јунајтед изгледаше дека е на добар пат да извојува победа, но сето тоа пропадна во 68-та минута.

Ериксен со извонреден шут погоди за 1:0 во првиот дел и Јунајтед заслужено имаше водство, но домаќините почнаа премногу да тактизираат, за што беа казнети поради големата грешка.

Данецот загуби топка на најлошо можно место и му дозволи на Ламерс да истрча сам пред голот, по што фудбалерот на Твенте израмни на 1:1.

Во самиот финиш, Јунајтед имаше стопроцентна шанса преку Мегваер, но иако топката се одби и сите ја видоа во мрежа, голманот Унерштал реагираше на гол линијата и спречи победа за фаворитот.

Видеото погледнете го ТУКА