Ерера со брутална споредба: Ние сме како деца на тренингот,а Мбапе е Јусеин Болт!

Андер Ерера минатото лето стави крај на својата етапа во Манчестер Јунајтед и како слободен агент му се приклучи на ПСЖ, тим во кој Шпанецот секојдневно тренира со двајца играчи кои според многумина се најдобрите во светот.

Нејмар веќе неколку години е на врвот на фудбалската елита, а тој пат сега го оди и Килијан Мбапе, сензационалниот француски голгетер од кој посебно е импресиониран и искусниот шпански везен фудбалер.

Ерера во Премиер лигата имаше можност да игра со голем број познати и звучни имиња, а сега вели дека се соочува со ситуација да се чувствува како дете покрај 21-годишниот напаѓач.

– Да бидам искрен, она што можам да го кажам за Килијан е дека понекогаш на тренинзите изгледаме како деца покрај него. Начинот на кој трча, едноставно ве остава неколку метра позади. Изгледа дека ние сме како деца, а тој е Јусеин Болт, – вели Ерера за „ЕСПН“.

– Во фудбалот честопати гледате фудбалери кои се многу брзи и кои ве оставаат позади. Но, кога е во прашање Килијан, кога ќе дојде пред голот, знае кога треба да сопре, да биде мирен и да постигне гол. Тоа го прави различен од обичните спринтери, – додава Шпанецот.