Емери објасни зошто Реал е во пол позиција за Мбапе: Тој ќе испише една ера во Мадрид

Унаи Емери имаше можност да го тренира Килијан Мбапе како предводник на ПСЖ и дефинитивно станува збор за човек кој може да говори за квалитетите на сензационалниот Французин, кој интересно не престанува да биде во центарот на вниманието пред секое отворање на трансфер пазарот.

Летниот преоден рок оваа година ќе биде поместен поради коронавирусот и малку веројатно е дека ќе видиме некој бомбастичен трансфер поради сериозните финансиски штети кои ги нанесе пандемијата, но сето тоа оди во прилог на клубовите кои сакаат да го видат Мбапе во своите редови поради една причина.

Мбапе има договор со ПСЖ до 2022-ра година и „светците“ ќе бидат приморани да преговараат за негов трансфер веќе наредниот јануари или јули ако не сакаат да го загубат без никаква отштета, ситуација која будно ја следи Реал Мадрид, клубот кој го посакува Килијан, но и клубот во кој младиот напаѓач се гледа себеси.

– Килијан има квалитети да испише една ера во Реал Мадрид. Ако се вратам во Шпанија, сакам да го гледам во Примера. Има одредени работи кои не го исполнуваат Мбапе во ПСЖ и поради тоа тука е Реал Мадрид.

– Ние сме среќни што ги имаме двата најдобри клуба во светот и јас сакам да ги гледам најдобрите играчи во светот во нашата лига, – порача Емери за „АС“.