Елмас: Одигравме одлично против Украина, сега се надевам дека ќе бидеме победници

Македонија немаше среќа на гостувањето во Прага и не претвори во гол четири добри шанси против Украина, па во таква ситуација поразот беше неминовен.

Нашиот најсилен национален тим остана без шанси за пласман на Европското првенство, но во ситуација кога има слободен ден во групната фаза, сепак играчите нема да имаат одмор.

Македонија утре ќе одигра пријателски меч со Ерменија во Струмица, а Елиф Елмас како еден од најквалитетните во нашиот тим најави максимално сериозен пристап и атак на победа.

– Играме пријателски натпревар против добар и квалитетен противник како што е селекцијата на Ерменија. Кога играш за Македонија, очекувањата се големи и секогаш се цели кон победа.

– Ќе излеземе на терен сплотени и ќе се потрудиме максимално да одиграме добар натпревар во кој се надевам дека ќе излеземе како победници. Одигравме одличен меч против Украина, но за жал го загубивме. Дуелот против Ерменија е важен за нас, затоа одиме да победиме.