Елмас одигра 60 минути, Торино профитираше од кошмарната одбрана на Милан (Видео)

Елиф Елмас првпат беше стартер по враќањето во италијанскиот фудбал, а тоа му донесе среќа на Торино кој успеа да го победи фаворизираниот Милан.

Македонскиот репрезентативец се најде во стартната постава на домашниот тим и одигра 60 минути после подолго време, па тоа дефинитивно е огромен потстрек за офанзивниот фудбалер кој ќе се обиде да ја пронајде својата најдобра форма во Торино.

Откако дебитираше со гол во поразот од Болоња, Елмас денеска првпат се израдува на победа со новите соиграчи, и тоа против тимот на Консеисао кој уште еднаш потврди дека игра кошмарно во одбрана.

Почетничкото недоразбирање меѓу Чау и Мањан резултираше со автогол и водство за Торино уште во 5-та минута, а овој резултат беше активен до последните 15 минути.

Пулишич не реализираше пенал во првиот дел и пропушти голема шанса да го врати мечот во посакуван правец за Милан, па за првиот гол на гостите се чекаше до 74-та минута кога погоди Рајндерс.

Во тој момент се доби впечаток дека Милан ќе ги нападне трите бода, но наместо тоа, следеше ново исклучување во одбраната, од кое одново профитираа домаќините. Играчите на Торино ја фатија одбрана на Милан на спиење при еден прекин, па акцијата заврши со победнички гол на Гинеитис во 76-та минута.