Елмас и соиграчите се израдуваа на гол во 92. минута, но ги снајде судбината на Хулијан Алварез (Видео)

Комо освои круцијални три бода денеска против Торино и дојде многу блиску до математичко обезбедување на опстанок, бидејќи на шест рунди пред крајот има 12 бода повеќе од 18-топласираниот Емполи.

Четата на Сеск Фабрегас денеска имаше тешка задача против разиграниот Торино и успеа да слави со голот на Дувикас, но во финишот трепереше за посакуваните три бода.

Торино успеа да израмни со голот на Илиќ по еден корнер во 92-та минута, па иако Елмас и соиграчите се израдуваа на погодокот, на крајот ги снајде судбината на Хулијан Алварез.

По проверката на ВАР, голот беше поништен поради двоен контакт со топката при изведениот корнер, па така Бираги се претвори во трагичар за својот тим.

Фудбалерот на Торино се лизна и имаше двоен контакт со топката пред истата да заврши во шеснаесетникот, а поради тоа израмнувачкиот гол на гостите не беше впишан на семафорот.