Елмас го најави мечот против Јувентус: Статистиката доволно говори за тимот на Мота

Елиф Елмас не се изнаигра од стартот на сезоната и трпеливо ја чека својата шанса од Марко Розе, а на Македонецот не му останува ништо друго, освен да се надева дека ќе добие шанса утре против Јувентус.

Елмас е играчот на Ред Бул Лајпциг кој најдобро го познава италијанскиот тим поради своето минато во Серија А, па токму поради тоа официјалната веб-страна на клубот реши да направи кратко интервју со македонскиот репрезентативец.

По ситната повреда која ја имаше изминатиов викенд, Елмас повторно е достапен за тренерот и ќе биде во комбинација за настап против Јувентус, откако на стартот на Лигата на шампионите веќе доби десетина минути против Атлетико Мадрид.

– Јувентус? Секогаш е тешко да се игра против италијански тим, а особено против Јувентус, еден од најголемите тимови од Италија. Имам играно со нив повеќе пати и свесен сум каква опасност носат дуелите со нив. Тие се бранат многу добро, тоа може да се заклучи и од нивната најнова статистика. Сепак, исто така се многу флексибилни во напад и претставуваат вистинска закана. Едвај чекам да почне мечот, се надевам дека ќе донесе голема возбуда за нас и за нашите фанови во Лајпциг.

– Во Бундеслигата се игра поразличен фудбал од Италија. Во Бундеслигата се игра подиректен, пофизички фудбал, се покрива повеќе простор и се мисли само да се игра офанзивно. Во Италија има повеќе посед, повеќе тактика и постабилна одбрана. Двете лиги се меѓу топ пет најдобри во Европа, – вели Елмас, кој прави и една паралела меѓу Тиаго Мота и Масимилијано Алегри.

– Тиаго Мота заврши фантастична работа во Болоња и ги внесе во Лигата на шампиони. Очекувањата од него се огромни, а ако се прави споредба, Јувентус играше многу подефанзивно со претходниот тренер. Како и да е, Јувентус уште нема примено гол по шест меча во Италија, што значи дека ќе мора да работиме напорно за да пронајдеме простор во нападот, – завршува Македонецот.