Елмас блескаше во Струмица, Македонија се покажа во одлично светло и оствари победа (Видео)

Македонската фудбалска репрезентација им се врати на победите, па на тој начин позитивно одговори на последниот пораз кој го забележа во квалификациите, натпревар на кој остави добар впечаток и покрај резултатот.

Репрезентативците тврдеа дека поразот од Украина е архивиран и дека максимално ќе се насочат кон предизвикот наречен Ерменија, кој ова попладне беше успешно положен во Струмица.

И покрај лошото време и тешките услови за игра, нашите фудбалери покажаа дека се неколку класи подобри од ривалите, а особено расположен беше Елиф Елмас кој учествуваше во трите гола.

Ѕвездата на Наполи не постигна ниту еден гол во победата од 3:1, но најпрво му асистираше на Трајковски, потоа го погоди дирекот пред Ристовски да погоди за 2:0, а асистираше и во ситуацијата кога Даци погоди за 3:0.

Во самиот финиш, избраниците на Благоја Милевски примија гол по еден прекин, па Ерменците постигнаа почесен погодок во 94-та минута.