Елези: Не постојат однапред добиени натпревари, ние имаме јасна цел

Македонската А фудбалска репрезентација ги започна подготовките за новото издание на Лигата на нации во кое на почетокот не очекуваат два натпревари против Фарски Острови и Ерменија.

Првиот предизвик е на гостински терен против Фарски Острови, дуел во кој ќе влеземе како фаворити, но во исто време ќе мора да бидеме внимателни затоа што тоа е селекција која знае да биде незгодна особено како игра пред своите гледачи.

Членот на Бохум, Агон Елези е свесен за тестот, ама верува дека ќе оствариме позитивен резултат кој ќе биде почетна точка, основа за остварување на целта, освојување на првото место во групата во која е и селекцијата на Летонија.

-Мило ми е што повторно сум дел од репрезентацијата. Во тимот владее позитивна атмосфера. Нашата цел е првото место. Почеток на сезона сме и сите момци се максимално спремни и се желни за добар резултат.

-Во модерниот фудбал нема добиени натпревари пред време. Фарски острови е многу незгоден ривал. Мора да се прилагодиме на нивната подлога (вештачка трева), но верувам во моите соиграчи и во позитивен резултат. Македонија во оваа група цели кон првото место со оглед на нашиот квалитет имаме право да веруваме. Но, тоа треба да го покажеме на терен, -порача Елези.