„Ел Команданте“ се враќа на Балканот: Раул Гонзалес ќе биде селектор на Србија

Поранешниот тренер на Вардар и некогашен македонски селектор, Раул Гонзалес се враќа на Балканот и тоа со ангажман во најблиското соседство, селекторската позиција во Србија.

Шпанскиот стратег го прифатил предизвикот и од наредната година ќе седне на клупата на Србите, поточно откако ќе го одработи договорот со Пари Сен Жермен.

-Договорот со Раул Гонзалес беше потпишан по натпреварот против Италија. Според одредбата во истиот договорot стапува на сила на 01.07.2025 година, односно од моментот кога господинот Гонзалес повеќе нема договорни обврски со ПСЖ. Раул има јасна цел пред себе – Олимписките игри во 2028 година, -истакнал генералниот секретар на РСС, Иван Миливојевиќ за „Арена Спорт“.

Раул има доста успеси, освоени титули во досегашната кариера, но најголем резултат дефинитивно му е пехарот со Вардар во Лигата на шампионите во кампањата 2016/2017.