Експресен камбек во Премиер лигата: Ван Нистелрој потврден како менаџер на поранешен англиски шампион

Руд Ван Нистелрој експресно се враќа во Англија и Премиер лигата каде до неодамна беше дел од Манчестер Јунајтед, прво како асистент на Ерик Тен Хаг, а потоа и како привремен предводник на екипата до пристигнувањето на Рубен Аморим на сегашната функција.

Португалецот не ја прифати подадената рака од Ван Нистелрој кој јавно се понуди да остане на „Олд Трафорд“, но фудбалските патишта се интересни, па на Холанѓанецот за брзо време му се отвори нова можност и од вечерва официјално е нов менаџер на Лестер Сити.

-Горд сум, возбуден сум. Сите со кои зборувам за фудбалскиот клуб Лестер Сити се ентузијасти. Тие имаат одлични приказни за квалитетот на луѓето кои работат во клубот, поддржувачите и секако, поновата историја на клубот е импресивна. Возбуден сум што можам да започнам и да ги запознаам сите и да дадам се што можам за фудбалскиот клуб, -порача Ван Нистелрој кој доби договор до јуни 2027 година.

Дебито на новата функција ќе го има наредната седмица против Вест Хем во ПЛ.