Ејбрахам за Леао: Не знае колку е добар, на свој ден…

Рафаел Леао игра променливо и во актуелнава сезона во која пак една работа е променета со новиот тренер Пауло Фонсека, а тоа е дека напаѓачот знае да биде резерва и натпреварите да ги почне од клупата.

Имаше неколку такви примери во тековнава кампања, а последниот беше против Слован во Братислава каде Леао доби шанса во вториот дел и веднаш направи разлика, постигна гол и му го отвори патот на Милан до посакуваниот резултат.
Ова дефинитивно може да му помогне во кревање на самодовербата иако само тој јавно потенцираше дека не му се допаѓа кога е резерва, но и дека е подготвен да помогне ако тоа е вистинската работа за екипата.

Инаку Леао знае да биде незапирлив, да „гази“ на теренот, па интересна изјава за него даде Тами Ејбрахам.

-Леао е многу важен играч за нас. Мислам дека не знае колку е добар. Може сам да добива натпревари, на свој ден е незапирлив. Мораме да го исполниме со самодоверба и да го донесеме на нашиот пат, -порача англискиот интернационалец.