Египет го преслуша Чиле на отворањето на ракометниот мундијал

Египет како домаќин на мундијалот денеска имаше привилегија да игра на отворањето на ракометното Светско првенство, турнир на кој домашната селекција е предводена од поранешниот тренер на Вардар и добар познаник на нашата публика, Роберто Парондо.

Шпанецот ќе биде наш противник во групната фаза откако добивме шанса како резерва да отпатуваме на најголемиот ракоментен собир, а во пресрет на првиот натпревар кој го играме утре против Шведска, го дознавме и првиот епилог од нашата група.

Египет покажа сила и крајно добра игра во офанзива во првото полувреме, во кое практично ги разреши сите дилеми кога е победникот во прашање. Чиле кој во загревањето за мундијалот на двапати загуби од избраниците на Данило Брестовац, вечерва немаше решение и за играта на Египќаните кои на крајот славеа со 35:29.

Големата предност му овозможи на Парондо да направи измени и да ги поштеди најдобрите ракометари пред следните предизвици, бидејќи вториот е токму против Македонија и натпреварот се игра во сабота.

Натпреварот меѓу Египет и Чиле беше единствениот од денешната програма на Светското првество, кое продолжува утре со седум натпревари, меѓу кои и оној вечерниот во 20:30 часот меѓу Шведска и Македонија.