Ѕвезда на финскиот ракомет: Го чекам легендарниот Лазаров, сакам да видам колку е силен!

Селекцијата на Македонија ги доби ривалите за квалификацискиот циклус за пласман на Европското првенство кое во 2022 година ќе се одржи во Словачка и Унгарија.

Избраниците на Данило Брестовац ќе се соочат со Данска, Швајцарија и Финска што значи имаме противници со кои можеме да се носиме, надигруваме, победуваме и со тоа да обезбедиме пласман на уште едно големо натпреварување.

Веќе ги видовме реакциите за ждрепката од страна на данскиот селектор Николај Јакобсен, а сега свој коментар за групата даде еден од најдобрите фински ракометари, Тему Таминен кој во минатава сезона во Лигата на шампионите даде 58 голови во дресот на Кокс.

-Среќен сум поради групата. Сите репрезентации се нови противнци мене. Има многу големи имиња во тие три репрезентации и со нетрпение чекам да се сретнам со нив. Играчи како Лазаров, чекам да го сретнам во живо, легенда, сакам да го видам во вистнскиот живот и да видам колку е силен, -истакна левото крило Таминен.

Токму првата средба ни е против Финска во Скопје во ноември, па Таминен дефинитивно ќе може да се увери во квалитетите на Лазаров.