Ѕвезда на Баерн одбива нов договор, планира да го следи патот на Левандовски

Баерн Минхен може да остане без еден од своите најважни играчи уште следното лето, а најава за такво нешто е одбивањето на Џошуа Кимих да потпише нов договор со германскиот клуб.

Германскиот репрезентативец има големо значење за тренерот Томас Тухел, но според медиумите тој одбива да го потврди останувањето и се шпекулира дека сака да замине во редовите на Барселона.

Договорот на Кимих истекува во јуни 2025 година, па наредниов период е клучен за неговата иднина, со оглед на тоа што Баерн ќе мора да преговара за негов трансфер претстојново лето, за следното да не мора да го загуби без отштета.

Кимих наводно е разочаран од многу работи во редовите на германскиот великан и не ја гледа својата иднина во редовите на Баерн, па Барса индиректно веќе добила сигнали дека треба да се подготвува за преговори кои би донеле еден од милениците на Чави во Шпанија.

Челниците на Баерн изминатиов период потенцираа дека посакуваат Кимих да остане во Минхен до крајот на кариерата, но и во нивните изјави се чувствува несигурност во однос на расположението на другата страна за такво нешто.