Ѕола: Англиските фанови на Јунајтед не можат да „сварат“ една продажба на клубот

Џанфранко Ѕола е италијанска фудбалска легенда која добар дел од кариерата му ја посвети на Челси, а како човек кој често е во Англија, многу добро може да даде реална слика за случувањата во Премиер лигата.

Напоредно со Премиер лигата, Ѕола будно ги следи и активностите во Серија А, каде според него на стартот на новата натпреварувачка сезона најпријатно освежување е Скот МекТомини.

Ѕола веќе во неколку наврати го фалеше шкотланѓанскиот играч за врска кој го доби Антонио Конте, а сега на Италијанците се обиде да им долови каква е реакцијата од навивачите на Манчестер Јунајтед во Англија.

– Скот без никаков сомнеж е едно од најдобрите летни засилувања кои ги видовме воопшто. Не зборувам само за Серија А, мислам општо во најсилните лиги.

– Тука во Англија се уште не можат да сфатат како Манчестер Јунајтед лесно пушти таков играч. Најверојатно тоа беше поврзано со финансискиот фер-плеј, но навивачите се уште не можат да ја сварат оваа одлука на клубот, – вели Ѕола во интервјуто за „Кориере дело Спорт“.